Hlaðvarp Bókasafns Hafnarfjarðar

Síðasta lag fyrir myrkur - Stormfuglar og Þung ský (e. Einar Kárason)

Síðasta lag fyrir myrkur er... Stormfuglar og Þung ský eftir Einar Kárason. 

Hjalti Snær Ægisson bókmenntafræðingur leiðir okkur inn í kvöldið með bókum, sögum, sagnfræði og tónlist í bókmenntahlaðvarpi Bókasafns Hafnarfjarðar, einn eða með góðum gestum. Sestu í uppáhaldsstólinn þinn, helltu upp á kaffi og komdu með.

Í þetta skiptið tekst Hjalti á við tvær bækur; Stormfuglar er áhrifamikil saga um örvæntingarfulla baráttu íslenskra sjómanna við miskunnarlaus náttúruöfl, og Þung ský er kynngimögnuð saga um hrikalegt slys við ysta haf og örlagaríkan björgunarleiðangur.

Báðar eru bækurnar eftir Einar Kárason, og eru sögutengd skáldverk sem tengja við raunverulega atburði á þann einstaka máta sem hefur gert Einar að einum dáðasta rithöfundi landsins.

Ræmurýmið - Clue: The Movie

Ræmurýmið er kvikmynda- og ræmuunnendaklúbbur Bókasafns Hafnarfjarðar, og er í umsjón Gunnhildar Ægisdóttur, kvikmyndafræðings. Mánaðarlega kemur út stuttur hlaðvarpspistill um kvikmynd mánaðarins, og myndin svo sýnd á bókasafninu viku síðar.

 

Löngu áður en Ævar lét okkur velja sjálf endann, löngu áður en Netflix gerði Bandersnatch…var Clue! Þessi furðulega költræma frá 1985 skartar þremur endum, en þar sem að ekki var hægt að bara ýta á ‘back’ þurfti fólk að giska ansi mikið því mismunandi endar voru sendir mismunandi kvikmyndahúsum, einn í einu. 

 

Meðal leikara eru Eileen Brennan, Tim Curry og Christopher Lloyd.

FlokkaFlakk - Flokkur 420

Bókasafn Hafnarfjarðar keyrir fram þekkingu og skemmtun á öldum ljósvakans! Halldór Marteinsson upplýsingafræðingur tekur titill sinn alvarlega og upplýsir hlustendur um snilld og sniðugheit hins alræmda Deweykerfis. 

420. Tala sem á sinn eigin dag. Tala sem er alræmd og fyndin í senn, - tala bara fyrir fullorðna. Tala í dægurkúltúr og bröndurum. Tala enska tungumálsins í Deweykerfinu.

Ræmurýmið - Svarti skafrenningurinn

Ræmurýmið er kvikmynda- og ræmuunnendaklúbbur Bókasafns Hafnarfjarðar, og er í umsjón Gunnhildar Ægisdóttur, kvikmyndafræðings. Mánaðarlega kemur út stuttur hlaðvarpspistill um kvikmynd mánaðarins, og myndin svo sýnd á bókasafninu viku síðar. 

Mynd októbermánaðar er engin önnur en Svarti skafrenningurinn sem má með sanni kalla fyrstu íslensku ofurhetjumyndina. 

Ungi sauðfjárbóndinn Kormákur öðlast ofurkrafta fyrir tilstilli lýsisfulls hrúts, - sem betur fer! Reykjavík er föst í klóm viðurstyggilega glæpahringja og ofurþrjóta sem svífast einskis, og lögreglan stendur á gati. Aðeins einn maður getur staðið gegn yfirvofandi heimsyfirráðum illskunnar.

 

Hann er virðing. Hann er réttlæti. Hann er…

 

Svarti Skafrenningurinn.

Síðasta lag fyrir myrkur - Í Gullhreppum (e. Bjarna Harðarson)

Síðasta lag fyrir myrkur er...Í Gullhreppum eftir Bjarna Harðarson

Hjalti Snær Ægisson bókmenntafræðingur leiðir okkur inn í kvöldið með bókum, sögum, sagnfræði og tónlist í bókmenntahlaðvarpi Bókasafns Hafnarfjarðar, einn eða með góðum gestum. Sestu í uppáhaldsstólinn þinn, helltu upp á kaffi og komdu með.

Önnur bók 18. aldar þríleiks Bjarna Harðarsonar um síðustu daga Skálholts - sem er einmitt titill síðustu bókarinnar - færir fókus þríleiksins frá fátækum kotbændum og yfir til kóngsins Köbenhavn, þar sem segir frá  séra Þórði í Reykjadal (1698-1776), sem eftir nám sitt (og þónokkrar flækjur áður en haldið var heim) sneri aftur til Skálholtsstaðar á 18. öld. 

Þegar heim er komið opnar Reykjadalsprestur hús sín fyrir farandi lýð flækinga og nýtur góðs af á engjaslætti. Hann er sjálfur frábitinn allri vinnu en skoðar veröldina með kátlegu kæruleysi þess sem lætur hverjum degi nægja sína þjáningu. Inni fyrir berst Þórður við trúarlegar efasemdir og forboðnar kenndir sínar til karlmanna. Í kararlegu sinni í Skálholti dreymir hann um að sjá Skálholtsstað í logum en hefur hvorki vilja né nennu til að kveikja þá elda.

Heimur samkynhneigðra, saumakerlingar drottningar, dreissugir skólapiltar, iðrandi syndarar og göldróttur staðarsmiður spila saman í lifandi og skemmtilegri frásögn. Íslandssagan og þjóð hennar birtist okkur með kröm sinni og skemmtan, og Hjalti útskýrir þetta allt af sinn einstaka og lifandi máta.

FlokkaFlakk - Flokkur 123

Bókasafn Hafnarfjarðar keyrir fram þekkingu og skemmtun á öldum ljósvakans! Halldór Marteinsson upplýsingafræðingur tekur titill sinn alvarlega og upplýsir hlustendur um snilld og sniðugheit hins alræmda Deweykerfis. 

Í fyrsta þætti verður farið yfir grunninn í þessari snilldarleið til að raða bókum upp á skiljanlegan máta, - og við hefjum leika á 1-2-3, þ.e.a.s. hundraðtuttugastaogþriðja flokki.

 

 

Ræmurýmið - Ferngully

Ræmurýmið er kvikmynda- og ræmuunnendaklúbbur Bókasafns Hafnarfjarðar, og er í umsjón Gunnhildar Ægisdóttur, kvikmyndafræðings. Mánaðarlega kemur út stuttur hlaðvarpspistill um kvikmynd mánaðarins, og myndin svo sýnd á bókasafninu viku síðar.

Fyrsta mynd vetrarins er teiknimyndin Ferngully: The Last Rainforest í leikstjórn Bill Kroyer, en myndin telst til einna fyrst umhverfismeðvituðu myndum samtímans ætlaðar börnum. Sagan segir af blómálfinum Crystu og félögum hennar sem þurfa að berjast við skrýmslið Hexxus áður en hann eyðir skóginum þar sem þau búa, en Hexxus dregur mát sinn úr mengun mannfólksins.

Meðal leikara eru Samantha Mathis, Tim Curry, Christian Slater, Jonathan Ward og Robin Williams.

Síðasta lag fyrir myrkur - Í skugga Drottins (e. Bjarna Harðarson)

Síðasta lag fyrir myrkur er...Í skugga Drottins eftir Bjarna Harðarson

Hjalti Snær Ægisson bókmenntafræðingur leiðir okkur inn í kvöldið með bókum, sögum, sagnfræði og tónlist í bókmenntahlaðvarpi Bókasafns Hafnarfjarðar, einn eða með góðum gestum. Sestu í uppáhaldsstólinn þinn, helltu upp á kaffi og komdu með.

Sögulegar skáldsögur eru enn í brennidepli, en í þetta skiptið leiðir Hjalti hlustendur um verk Bjarna Harðarsonar, sem segir frá leiguliðum Skálholtsstóls á 18. öld. Við fylgjumst með Maríu, stúlku af Álftanesi sem orðin er húsfreyja á Eiríksbakka, Greipi bónda og Jónunum tveimur sem honum fylgja, að ógleymdum niðursetningnum sem er óguðlega kjaftfor og skemmtinn. Yfir og allt um kring er þrældómur og guðsótti. Við sögu koma misfrómir guðsmenn, bændur og búalið, skólapiltar, hljóðfæraleikarar, maurapúkar og litskrúðug mannlífsflóra alþýðunnar.

(ó)Vitinn - 4. þáttur - Gulli Arnar: Bakarameistari

Eitthvað fyrir svanga í sumar(ó)Vitanum! Gulli Arnar er mættur og spjallar við Hugrúnu Margréti um lífið og tilveruna, og líkast til örast vaxandi litla bakarí í bænum okkar.

Síðasta lag fyrir myrkur - Blóðberg (e. Þóru Karítas Árnadóttur)

Síðasta lag fyrir myrkur er...Blóðberg e. Þóru Karítas Árnadóttur

Hjalti Snær Ægisson bókmenntafræðingur leiðir okkur inn í kvöldið með bókum, sögum, sagnfræði og tónlist í bókmenntahlaðvarpi Bókasafns Hafnarfjarðar, einn eða með góðum gestum. Sestu í uppáhaldsstólinn þinn, helltu upp á kaffi og komdu með.

Árið 1608 sver ung stúlka í Skagafirði, Þórdís Halldórsdóttir, eið um að hún sé hrein mey eftir að upp kemur kvittur um ástarsamband hennar við mág sinn en slíkt var dauðasök á tímum stóradóms. Fimm mánuðum síðar fæðir hún barn. Þórdís má lifa með ásökunum um blóðskömm og í trássi við landslög er henni gert að sæta pyntingum segi hún ekki til barnsföður síns. Á hverju ári ríður hún suður heiðar til að mæta fyrir Alþingi á Þingvöllum en heill áratugur líður þar til dómur er kveðinn upp.

 

Tónlist: The Irish Heather (Elena Galitsina - Audio Jungle)